بدون لف أو دوران! أسئلة مستعجلة! إلى غبطة البطريرك لويس ساكو

نشر يوم 27 آب 2025 مقالة: “القداس الأول لأدي وماري: الأصالة والتجديد”.

هسّة الأصالة والتجديد خليها تروحلّك فدوه، ومضمون المقال مشوه وبعيد عن الحقائق اللي عدنا وثائق بيها ودننشرها لكم ..

بس الخاتمة مُصيبة:

“القربان لا يتحول فقط بالكلام الجوهري الذي هو سرد للعشاء الأخير، إنما بمشاركة المؤمنين في الصلوات بإيمان من البداية إلى النهاية. إيمانهم وصلاتهم يحوّلان الخبز إلى جوهر جسد المسيح. فالغرض في الإفخارستيا هو أن يَحِلّ الجسد المبارك محلّ الخبز، وليس تحقيق الحضور الإلهي مادياً، ولا إلى تطبيق المراحل الخلاصية من حياة ربّنا يسوع المسيح الأخيرة على مختلف أجزاء القربان المقدس.

إن معنى التكريس ليس في تحويل المواد، بل في حصول المؤمنين على نعمة الخلاص الذي نالوه في المعمودية ويتجدد باستمرار في القربان المقدس.”

هذه الخربطة اللاهوتية واللخبطة التأوينية والتحريف الصريح حيّرت الناس كلها، والكل يسأل: “شنو قصد سيدنا؟”

1.    يعني سيدنا، إذا ما عندنا إيمان قوي، يسوع ما يجي على القربان؟

2.    الاستحالة اللي الكنيسة تعلّم بيها من 2000 سنة طلعت مجرد رمز جماعة؟

3.    الكاهن إذا قدّس وحده، قداسه باطل؟ طبعا مو كل الكهنة لأن قسم فوك راسهم ريشة وجابين نقش عندك ومحد يقول لهم على عينك حاجب؟

4.    ممكن قداس بالمنصور صحيح، بس بسانتياغو باطل لأن الناس هناك إيمانهم أضعف؟ طبعا قداديس أربيل وأستراليا ودهوك موبس باطلة! بل تودي لجهنم؟

5.    صار القداس مجّرد عمل بشري معتمد على مزاجنا، مو عمل المسيح نفسه؟

6.    إذا ماكو حضور مادي، معناها يسوع مو حاضر بجسده ودمه، صح لو لا؟

7.    المؤمنين أقوى من الكهنوت؟ يعني الكاهن ما يكفي وحده؟ وإذا قررت الناس الإضراب عن الحضور، فالكاهن يعزّل الكنيسة ويكعد يم أمه؟

8.    الحضور يصير مثل (شبكة الموبايل) قوي هنا وضعيف هناك؟ وأكيد هو قوي بالمنصور وضعيف في كنائس أخرى.

9.    وإذا حضر واحد مشكك أو ما يفهم اللغة… القداس كله غير صحيح ولا فاعلية له؟

10.  مو الكنيسة تقول: الأسرار تشتغل بقوة المسيح، مو بقوتنا؟ زين هذه شلون تربطها وتعدّلها؟

11.  إذا ما صلّينا مضبوط راح ينسحب يسوع زعلان ويقول: انتم مو خوش ناس؟

12.  طيب، القداديس اللي نحضرها عند اللاتين وإحنا ما نفهم لغتهم… باطلة لو شنو؟

       ناسنا الكبار بالعمر ناخذهم عند اللاتين وما يفهمون شنو ويتناولون، تناولهم باطل؟

13.  صارت الإفخارستيا “تجديد معمودية” فقط؟ طيب والـ2000 سنة تعليم كنسي… كلّها خطأ؟

14.  الفرق وين بين القداس وبين أي صلاة الإنجيليين؟

15. والأطفال شنسوي وياهم إذا سألوا: “يسوع موجود حقيقة بالقربان؟”

16.  إذا حضرنا عادةً أو مجاملة، يسوع ما يجي؟

17. منو نصدّق: التعليم المسيحي الرسمي، لو مقالاتك؟

18.  وبعدين، مو هذا الكلام يزرع انقسام: قسم يؤمن بالحضور الحقيقي ليسوع، وقسم يعتبره رمز؟؟

      والسؤال الأهم : العشاء الأخير ليسوع، هل هو صحيح أم باطل؟ لأن يهوذا كان حاضر العشاء وأخذ من ايده ليسوع؟

يا سيدنا، مع احتراماتنا لشهاداتك ودراستك! المسألة مو فلسفة شخصية. هذا نسف للإيمان وتخريف لاهوتي صريح ..

الناس تريد جواب واضح: يسوع حاضر حقًا بجسده ودمه في القربان؟ أم ان كل شي صار يعتمد على إيماننا إحنا؟

ننتظر من غبطتك رد صريح، لأن وبصراحة (الموضوع ليس لعبة) إنه إيمان الكنيسة الكاثوليكي.

وسؤال بسيط للمطارنة: مرحبا عليكم: هذا مخرف لاهوتيا وبدأ يخربط وكبر بالعمر وتعب هواية. مو صار الوقت علمود شوية يصحى ضميركم وتشوفون حل للقضية لو هم هذه (نزتها جوا الفراش!!!) يلّه خلوها سكته جّنكم ما قريتم شي

عن كادر الموقع