بالحقيقة والواقع الشغلة صار ينرادلها صفنة …
هواية مرات سمعنا من كنا بالعراق مقولة: “الصفنة مو إلك”، بس الصراحة، شغلة البطرك والمطارنة وجعجعتهم الإعلامية ينرادلها صفنه!
والسبب لأن الجماعة مستحميرنا هو وكل الي يهتمون بيه، أهم شي كراسيهم عل راس وطزّ بينا إحنا.
*من صفنت قلت مع نفسي: هذولة ليش ديكتبون بالفيسبوك وينشرون هل الفضائح مالتهم ؟ “وعلى عينك يا تاجر”
– معقولة ماكو بالكنيسة إجراءات تخص الخلافات بين المطارنة؟
– ماكو فد جهة بالفاتيكان تتدخل بيناتهم وتفض مشاكلهم؟ واحد يقول هي اختلاف وجهات النظر! على منو دتضحكون؟
– معقولة توصل للتراشق الإعلامي وتشمّير الطوابيق واحد عل ثاني؟ الطابوق هذا يجوز ما يأثر عليكم (محصنين نفسكم زين) لكن ما فكرتوا انه يعوّر ناس أبرياء؟ يشككهم؟ يخلق بلبلة؟ تتشوه صورتكم بعيونهم؟
*وأخذتني الصفنة زايد، وعجبتني بصراحة، مضيعة وقت وما عدنا شيء الكهرباء طافية، گلت نتسلى بيهم مثل الچنة والعمة صاير حالهم! سألت نفسي: شنو شغل البابا مادام وصلت الحالة للستار!
شنو دوره تجاه هذه المشكلة؟
ليش ما يكتبون للبابا علمود هو يفضها؟ ليش يطلبون من الناس البسطاء مثلنا حتى نلزم بظهر هذا وذاك؟ واذا لزمنا الظهر الي ما يناسبهم يجي دورنا احنا هم …
وبعدين أحنا أصلا أش عرّفنا بالطقوس والليتورجيا؟
والقبِلة تجاه مكّة أو القدس أو قُم أو واشنطن؟
أكو ستارة لو ماكو ستارة؟
شنو قصة خلاف البطرك مع بابليون؟ وليش المطران مطنّش هل الصراع ويستقبلهم بالأحضان؟
وشعنده المطران وياهم وهو أصلا معروف عنه بارتي للعظم؟
تره الشغلة بيها هواية قنابل موقوتة ويردون من عدنا المساكين نمشي بأرضهم ونصير واحد ضد الثاني، وبالاخير راح يكعدون ويطيحون كلشي جوا القنفة، ويطلعون بالمواقع ويكولون: “الاختلاف بالرأي لا يفسد للود قضية”.
بصراحة، عجبني واحد من ربعنا من كتب: “عندما يتصارع الكبار لا تتدخل خذ موقف المتفرجَ!!َ!”، بصراحة النصحية حلوة ومعقولة، الظاهر الأخ منجوي من الكبار.
*ورحت بالصفنة هواية عميق، ووياه بيك عرق ألقوشي، بلا مّزه، وحسيت نفسي أنيشتاين بالأسئلة، فطفر سؤال:
أخونا بالله، الزعيم القائد المهيب (مرّبع الركن) شنو الي يريده كل يوم طالع بمقالة تسقيطية على جماعته؟
ينزّل من مكانتهم واحترامهم بعيون الناس؟
ليش ما يكتب الهم مباشرة ويعوفنا بحالنا محترمين البطرك والمطارنة والقسان؟ معقولة ما يفكر هسة الناس أش تحكي على الكنيسة؟
وشنو هل المشاكل بحيث لازم يفضح هذا وذاك من جماعته؟
شباب ما تحسون أكو شي بالموضوع ما دنعرفه وصارين إحنا الاغنام المطيعة هذا يودينا وذاك يجيبنا؟
وووين بقية المطارنة من السالفة كلها؟ شو ساكتين ولا يمهم الموضوع؟
معقولة كنيستنا مثل تيوس العراق مصالح ومشيلي وأمشيلّك؟
ترا الشغلة مو راحة أبداً !!!
عرفتم ليش الجماعة مستحمرينا وماخذينا غفل؟ وسارحين بينا؟ ودينزلون بهل “البطوخي” على رؤوسنا ورؤوس اللي خلّفونا. واحنا مثل القرج نركص لـهذا ونركص لذاك، ونقدم احترامات گدامهم ومن وراهم وجوهنا محمرة من الخجل من مستواهم!!!
الحقيقة من البطرك ونازل (مع احتراماتي للي عدهم روحية) أما البقية فـ مُجرد مرضى ومرّضونا وياهم، صرنا إزدواجيين درجة اولى بفضلهم، گعدوا راحة خل الله يسامحكم، وخلونا احنا بصفنتنا مع انه الصفنة مو النا الصفنة للمطايا الي سببوهاااا …
كادر الموقع
