النرجسي والهائم بحُب ذاته والعاشق لأفكاره والمهووس بسلطته يطلع كل فترة ويعيد القوانه المجروخه:
“أنا دعوت لتأسيس مجلس بطاركة ومطارنة جديد ” …
الموجود الحالي ما ينفع وما أريده … واحنا الكلدان الأغلبية 80 % … وهسة يمكن صارت 85 % وبعد شهر تصير 90% (تعرفون السوق ديصعد والمصاريف زادت).
وطبعا كل البطاركة والمطارنة منطين الأذن الطرشه ولابسين الوضعية … ومحد يدير له بال وكأنه ما موجود، يعني على قول المثل العراقي “حجي ساسوكي مثل بُوله بشط”
إذا أنت تنادي ومحد يسمع لك معناها: الحل إنك ضروري تعيد النظر بفكرتك وتراجعها زين وتبدي تزور البطاركة والمطارنة وتتحدث وياهم بتواضع وبدون تعالي واحكام وتشكيك عليهم، تسمع منهم وتفهم موقفهم يمكن توصلون لفد صيغة حلّ وترجع المياه إلى مجاريها لأن بصراحة فاضت وانفضحت وطلعت ريحتها.
معروف عنّك وواضحة نرجسيتك وتكبرك وغطرستك، ما تاخذها مسيحيا ولا عندك علاقة بتعاليم الإنجيل، لهذا تصرّح ضمنياً:
كلهم شياطين وخونة وسماسرة وأعداء الكلدان وتجار دين وذيول السياسيين وأقلية وانت وحدك بالساحة!!
الإنجيل يعلمنا: “كبيركم خادمكم ” ،،، “لا تدينوا كي لا تُدانوا”. أنت قلبت الكنيسة إلى محكمة تفتيش شخصية: القاضي إنت والشاهد إنت طبعا الجلاد هم إنت.
صار أسهل عندك دكول “خونة” من أن دكول “إخوتي”. صارت كل الناس المعارضة لأفكارك مجرد متمردين وشياطين وصرت سياسي من الدرجة الثالثة، ما عنده برنامج غير التشكيك بغيره الي وصل حالنا للانقسامية.
كل الناس تعرفك انسان نرجسي خايف من فقدان السلطة ولهذا عندك سلاح التخوين ويخليك تتصور نفسك بريء وعادل والباقي أشرار ليوم الدين، وبمكان ما تغسل الأرجل مثل معلمك صرت تجرهم بالطين وتوسخ سمعتهم بالاعلام الرخيص وشرذمت الكنيسة وفلّشتها ووصلتها للحظيظ …
إنت حولت نفسك إلى مرآة مقلوبة: كل العالم بيه عيوب إلا صورتك. وعلى قوله المثل البغدادي: إبليس ما يكول عن روحه عوج”، فإنت ما تشوف عوجك، بس تشوف عوج غيرك.
الرسالة واضحة: صرت عالّه على الكلدان وعلى المسيحيين بالعراق … انتهى فلّمك … خلّصت فلوسك وما عندك شي تقدمه لهم لأن ما عدهم ثقة بيك، وهم يعرفوك زين: سوالف علاوي ما توكّل خبز.
أفهمها يا ساسوكي (يُمكن انت فاهمها بس مغلّس) وهذه هي التعاسة، والأتعس منّك هم الناس اللي تصدقك وتبلع أكذايبك وتمشي وراك وراك مثل الذيل الأعوج.
“لو دامت لغيرك يا من أجرمت بحق سمعة الكنيسة لما وصلت لك”.
