رجعت حليمة لعادتها …
سؤال ينطرح بعد كل تصريح يقدمه ساكو:- مو عيب عليك توصل مستواك لهل حال؟
ما يكعد راحة مطيرجي بغداد إلا ويطلع بسالفة كل يوم ويبلش بواحد جديد.
يعني: إذا ما عنده عركه مع غيره لازم يتعارك ويه روحه!
والسالفة اليوم مع مجلس رؤساء الطوائف المسيحية في العراق.
وكونك يا ساسوكي عالم بالفقه الإسلامي فنحب نكول لك:- إجمع الفقهاء على عدم قبول شهادة المطيرجي، لأنه جذاب ويحلف جذب، ويبوك طيور الناس، وتشوفه دائما على السطح يباوع على خصوصياتهم، والناس حتى ما كانت تنطيه بنت، بسبب كثرة مشاكله والحلفان مالته الجذابي، ومحد بالمنطقة يصادقه إلا المطيرجية مثله، وبيناتهم يتزاعلون من تصير بوكه طيور ويتصافحون بعد الانتقام من طيوره.
نجي عليك يا مطيرچي زمانك!
*اللكط اللي تذبه علينا ما يفيدك بعد، وصارت شغلاتك بايخه ومُخجلة.
العالم تعرف انك انسحبت وصعدت على السطح لوحدك تطيّر الفياله مالتك لأنك كنت تريد ولازلت تطمع بـ الزعامة والرئاسة، وهنا رؤساء الكنائس قالو لك: إحنا هم بطاركة مثلك وماكو زعيم علينا؟ كل السالفة وما بيها! انك ما تقدر تكون بمكان إذا ما تكون الزعيم الأوحد، والناس تنبطح كدامك: “لا زعيم إلا الزعيم” …
*اللكط الثاني مال سالفة الأغلبية الكلدانية، هذه شلّك بيها؟
أشو صاير طويرني متوحش على الكنائس وطير أزرق تكّلب لوحدك!
تعال احسبها: قره قوش أغلبية سريانية. برطلّة أغلبية سريانية. دهوك أغلبية أثورية. والكنائس الإنجيلية وصلت 40 كنيسة، وكل المجتمعين معترف بيهم بالحكومة وماشي شغلهم على مستوى عالمي، اما انك ترفضهم لو تقبلهم، أصلا هم ما معترفين بيك، لا معبريك. ركز شوي تره بيهم بطاركه ومطارنة كاثوليك وفي المجلس مطران اللاتين!
لابس الحضور اللاتيني! وماهمك يكتب عليك للفاتيكان؟
للعلم مطران اللاتين يعني مثل السفير في بغداد، أخاف ما تعرف.
وعلى طاري السفيرة دير بالك (إذا شدّوا عليك الكنائس الإنجيلية قايش)، كل طيورك راح يخمطوها، وما تكدر على المگاصص مالهم بأمريكا، هذوله دولة وعلم.
اللهم إذا انت متحالف معاهم ضد الكنائس الرسولية، وووبصراحة مو غريبة عليك هذه القذارة!
انت تعرف انهم فطنوا على سوالفك، وعرفوا تحركاتك لعزل مدير الوقف وتعيين واحد موالي لك قلبا وقالبا! وشافوك تتوسل بالحكيم وحمودي والمالكي، وردت تعبرها عل الغشمة، طلعت عند السنة اللي انت تقول ما عدهم مرجعية، فهذا الجذب ما يعبر عل الناس.
وأزيدك من الشعر بيتاً: (يكولون غريمك موافق على سحب مدير الوقف مقابل صفقة جبيرة من الإطار) ويكولون الصفقة حيل ثكلية، وانت تعرف انه بالسياسية ماكو شي بـ بلاش!!! وهنا، شراح تربح من إزاحة مدير الوقف إذا كان الغريم يربح أكثر منّك؟؟؟
ليش ما تخليك گمرلي وحباب، عوف الشراسة ما تسوى الشغله، وإذا طار مدير الوقف فما راح يطير برخص والشيخ راح يقبض دبل من وراك يالأهبل ويمكن يبوسك على الصفقة اللي راح يأخذها!عوفك من هل الخراعات التي تضرب بيها وتخوف بيها الناس، والعاع عاع مالتك صارت عتيكه وماكو طير ينزل لك يا غراب الكنيسة الكلدانية.
وأخيراً وليس آخراً يا مطيرجي بغداد:
كم معركة لازم تخسرها علمود تعرف انك صرت عبأ على الكنيسة والكلدان في العالم أجمع؟؟؟
