من حقنا نستغرب من الوضع الراهن وما يحدث في الكنيسة الكلدانية.
صدمة وراء صدمة، تكفخنا يوميا عندما نقرأ المقالات والتعليقات الفاضحة والمخزية. حرب إلكترونية ام ماذا؟ ترى عيب كافي لموا جوالاتكم ودخلوا للبيت فرجتوا العالم عليناااا
نتكلم بلغة تفهموها:
اليوم! رجال الدين اصحاب الغبطة والسيادة والنيافة والقيافة وقسان اصحاب الياخة صاروا يتناطحون ويتهاوشون ويتعرون امام الناس، والقاصي والداني يقرأ ويتحسف على هل المستوى الهابط.
معقولة هذوله قدوتنا؟؟
معقولة هذوله ناذرين نفسهم لله وللكنيسة؟ ؟
اي انحطاط اخلاقي تعيشه الكنيسة حتى تتفجر بوجهنا كل هذه المفاسد؟؟
هل احنا مو خوش ناس حتى يُولَى علينا مثل هل الرؤساء؟؟ خزيتونااااا بين الكنائس وبين العالم
يا ربي شنو خطيئتنا؟
نقطين لشخصين لعبوا طوبة بيناااا
أولاً: البطرك المخربط
اللي يتحمل كل المسؤولية هو الرأس الجبير لان هو صاحب الوزنات الأكثر “ومَن يُعطى له كثير يُطالَب بالكثير”. وما يقدر يبرر ويقول أنا ما عليَّ، الخراب منك وبسببك يلي جبير بس باللقب!
إفتهمنا انك إنسان انفعالي ومزاجي من جنت قسوس صغيرون تدّور سوالف وقصاصات اخبار ومهوس من زمان بكتابة التقارير عن هذا وذاك. (يموت بس يلزم سالفة على واحد ويهدده بيها)، وهوايته نشر هذه السخافات والخربطات في الكنيسة كلها. والمعروف اكثر ان المعلومات الي دتنشر بموقع الحقيقة هو الي منطيها للبعض! اسخريوطي زمانك
بزودك وبفضل تربيتك، اليوم ماكو واحد يثق بالثاني الكل يكتب عل الكل والكل يسجل على الكل، وصاحبنا متربع على عرشه مستقر ومتونس على انقسام وعركات الكل، نعرفه يتّختخ عل فضائح. تكتيكات بعثية متقنه، عفية بالسبع وفوگاها مسوي جحوش يمدحون ويعظمون ويمجدون الزعيم المُفدى ويسقطون ويفشرون ويقشمرون كل مُعارض. هو يحجي عل أسامي المستعارة واغلب الي يردون ويعترضون على مقالات الي تكشف سوالفه بأسامي مستعارة! يااااطبيب اشفي نفسك.
ثانياً: أبو الهول الصامت
العجيب والغريب بالقضية كلها هو المطران بشار الريالي، الغريم الصامت اللي يسمع ويقرأ ويتابع وما يتحرك اعلاميا!!! (لا ارى لا اسمع لا اتكلم). ما شاء الله على إمبراطوريته!
– اتهامات الفساد المالي في المشاريع مالته واصلة لابو موزة!!! وماكووو جووواب !!! …
– حياة البذخ والسفرات وسيارات لقسانه المدللين وإرضاءهم بالأموال وفرعنتهم على الناس وهو ولا كأنه عنده الشغلة!!! وهم ماكووو جووواب!!! …
– عزايم ومطاعم هو والقسان، يتفاخر بالسيگار الكوبي وهو لابس الوضع كله! احدهم كتب لموقع الحقيقة: هذا المطران عباله يعمينا بالفلوس ويسكتنا شگد غشيم … وهو ماكووو جووواب!!! …
– اتهامات فساد قسانه وعلى رأسهم ابو المحاكم اللي هو مسؤول عليه، الي طفحت وطلعت ريحته وماكو اي تحرك منه! “عجيب امور غريب قضية” لا وفوك القهر جابه من بغداد وفرضه على الابرشية ومحد فتح حلگه والناس تسأل شنو المصالح والملفات المشتركة بينه وبين رئيس المحاكم المشهور حالياً بـ (كازانوفا) حتى يتستّر عليه ويحميه كل هذه السنوات؟ وهم ماكووو جووواب!!! …
– كهنة يتركون الابرشية وغيره يترك الكهنوت ولا عبالك، وفوگاها يعينه ويزوجه! عجيييب!!! …
– اتهامات بالتبعية السياسية المطلقة للبارتي الكردي ويطنش!!! مغازلة وموالاة لريان الكلداني ومغلّس!!! عجيييب!! …
– العالم تسولف انه ديمهد الطريق للتعامل مع الشيعة في بغداد تحضيرا لإنتقاله بقطار بابليون، وهو ولاداير بال لحجي الناس. عجيييب!!! …
– * افتهمنا يالـبراغماتي بس كافي لان احنا أصلا ما نريدك تكرمنا بسكوتك! نريد تنطق يا ابو الهول!
– لا ويگولون أبو السيگار ما يتحرك ولا يأخذ اي خطوة قبل مشورة ريان الشيخ المُنَزل (ص) واذا ريان قال له روح يروح واذا قال تعال يركض!!! عجيييب!!! …
– وبالمقابل يخلي البطريركية محسومة له وإلعب وحدك بالساحة. هذا الي جان ناقصناااا …
إلى متى هذا الصمت؟
تُرى هل هناك ما يُخبئه المطران لنا؟
هل هو هلگد قوي ومسيطر؟
منو يدعمه؟
ليش محد يقدر يحركه من مكانه؟
لصالح منو يعمل؟
معقولة ما ديحسبها صح؟
من هو الرابح وشنو يربح؟ ومن سيخسر؟
الحقيقة الواضحة والواقع المُبين، انه الناس المساكين والمؤمنين المتفرجين الخجلانين المحتارين هم الطرف الخسران وذلك بسبب صراع الزعامات والجبابرة (الي ممكن جداً بعد فترة يتصالحون ويتعشون) واحنا بعدنا ما فهمانين شي لان ::: ماكووو جووواب …
كادر الموقع
