Literature

ܒܪܝܟܼܐ ܡܘܠܕܗ ܕܦܪܘܩܢ ܘܡܓܡܘܠܗ ܥܗܕܗ ܩܕܝܫܐ

ܟܠܝ ܥܒܘܕܐ ܕܦܬܐ (ܐܢܐ ܟܠܕܝܐ) ܡܩܪܘܒܐ ܬܐ ܟܠܝ ܩܪ̈ܝܐ ܥܙܝܙܝ، ܒܘܼܪܟܵܬܐ ܒܗܠܝܢ ܝܘܡܢ̈ܐ ܩܕܝܫܐ ܕܡܘܠܕܗ ܕܡܪܢ ܝܫܘܥ ܡܫܝܚܐ ܡܟܼܠܨܢܐ ܕܥܠܡܐ ܡܢ ܥܒܕܘܬܐ ܕܚܛܝܬܐ، ܘܣܒܪܢ ܒܡܪܝܐ ܕܗܘܐ ܝܠܕܗ ܡܒܘܪܟܼܐ ܘܫܪܝܬܐ ܚܕܬܐ ܒܚܝ̈ܐ ܕܟܠܝ ܡܫܝܚܝ̈ܐ ܘܡܗܘܝܡܢ̈ܐ ܒܫܪܪܐ ܘܡܕܦ̇ܘܥܐ ܐܠܗ̇ ܘܒܸܚܵܝܵܐ ܚܠܵܦܲܗ̇، ܘܒܦܪܝܫܐܝܬ ܥܡܢ ܟܠܕܝܐ ܡܫܝܚܝܐ ܕܦܫܠܗ ܛܪܝܕܐ ܡܢ ܐܪܥܐ ܕܒܒܘܬܐ، ܒܝܕ ܡܢܝܢܢ ܐܝܠܗ ܒܒܨܪܐ ܒܡܲܘܛܵܢܵܐ  ܕܝܸܡܵܐ ܝܘܡܐ ܒܬܪ ܝܘܡܐ، ܐܠܐ ܐܝܘܟ ܒܸܚܵܝܵܐ ܒܐܡܝܢܘܬܢ ܠܥܗܕܐ ܩܕܝܫܐ ܒܕܘܟܬܐ ܕܸܟܚܵܙܘܼܟܼܠܵܐ ܓܝܵܢܲܢ ܕܝܘܟ ܚܹܪ̈ܐ ܘܐܨܠܝ̈ܐ ܒܓܘ ܐܪܥܐ ܕܐܠܗܐ ܪܘܼܚܬܼܵܐ.

(ܐܝܼܬܹܠܲܢ ܬܕ ܣܓܼܘܕܟ ܛܠܗ) (ܡܬܝ 2: 2) ܫܪܝܬܐ ܡܢ ܐܪܥܐ ܕܒܒܠ (ܡܕܢܚܐ ܕܐܘܪܫܠܡ)  ܪܟܼܫܠܝ ܗܠܝܢ ܐ̄ܢܫ̈ܐ ܒܬܪ ܟܘܟܼܒܐ ܒܗܪܢܐ ܡܢ ܫܡܝܐ ܐܝܘܐ ܓܠܝܐ ܬܐ ܥܡܐ ܕܟܸܡܩܵܛܹܥ̄ܘܵܠܹܗ ܐܠܗܐ ܥܗܕܗ ܥܡܗ (ܕܗܘܐ ܐܠܗܐ ܛܠܗ) ܐܡܕ ܦܪܨܘܦܐ ܩܕܡܝܐ ܕܦܫܠܗ ܡܓܒܝܐ (ܐܒܪܡ ، ܐܒܐ ـ ܪܡܐ) ܕܗܘܐ ܐܒܐ ܕܥܡܡ̈ܐ (ܒܪܝܬܐ 17) ܗܕܟܐ ܕܐܸܠܲܝ ܡܓܼܘܫ̈ܐ  ܕܦܝܫܐ ܡܟܘܡܠܬܐ ܗܕܐ ܕܕܝܬܝܩܐ ܥܡ ܕܐܠܗܐ ܕܦܫܠܗ ܒܪܢܫܐ (ܝܘܚܢܢ14:1) ܠܗܕܐ ܬܒܥܠܲܝ ܒܗܪܐ ܕܟܘܟܒܐ ܬܕ ܡܛܐ ܐܠܗ ܘܥܒܼܕܝܼ ܡܢܕܝ ܕܝܠܝ ܦܩܝܕܐ ܡܢ ܕܪ̈ܐ.

ܒܬܪ ܦܲܬܲܫܬܵܐ ܘܒܩܪܬܐ ܡܢ ܐ̄ܢܫ̈ܐ ܕܡܕܝܢ̄ܬܐ، ܕܠܬܘܠܝ ܝܕܥܬܐ ܒܐܠܗܐ ܢܚܝܬܐ ܡܢ ܫܡܝܐ ܒܕܘܡܝܐ ܕܒܪܢܫܐ، ܐܠܐ ܐܢܝ ܢܘܟܼܪ̈ܝܐ ܡܢ ܐܬܪܐ ܬܕ ܐܡܪܝ (ܕܗܘܝܠܗ ܡܠܟܐ ܘܐܝܬܠܢ ܬܕ ܣܓܼܘܕܟ ܛܠܗ) (ܡܬܝ 2:2 ) ܘܡܩܪܘܒܐ ܡܫܲܠܡܘܼܬܐ ܕܝܗܝܝܢ ܬܐ ܡܠܟܐ ܡܘܥܕܐ ܠܦܘܪܩܢܐ ܕܒܪܢܫܘܬܐ ܡܢ ܥܒܕܘܬܐ ܘܚܪܪܬܐ ܕܐܢܫܐ ܕܦܫܠܗ ܒܪܝܐ ܐܠܕ (ܨܠܡܐ ܘܨܘܪܬܐ ܕܐܠܗܐ) ܒܪܝܬܐ 27:1. ܬܕ ܕܐܪ ܠܚܹܪܘܬܐ ܕܒܪܘܢܘܬܐ.

ܗܕܐ ܒܬܪ ܡܢ ܚܡܠܹܗ ܟܘܟܒܐ ܥܠ ܒܝܬܐ ܕܝܘܐ ܝܫܘܥ ܛܦܠܐ ܐܠܗܝܐ ܘܥܡܗ ܝܡܗ ܡܪܝܡ ܩܕܝܫܬܐ ܡܩܪܘܒܠܝ ܕܲܫܢܹܐ ـ ܗܵܕܵܝ̈ܐ ܕܝܗܝܢ، ܘܦܫܠܗ ܚܙܝܐ ܛܠܝܗܝܢ ܡܠܐܟܼܐ ܕܡܪܝܐ ܬܕ ܕܐܪܝ ܒܐܘܪܚܐ ܚܪܹܬܐ ܐܠܕ ܐܬܪܝܗܝܢ (ܡܬܝ 12-9:2) ܒܗܕܐ ܕܗܘܝ ܐܢ ܐܢܫ̈ܐ ܩܕܡܝܐ ܕܛܥܢܝ ܣܒܪܬܐ ܕܦܘܪܩܢܐ ܬܐ ܐܚܢܘܬܝܗܝܢ ܡܢ ܓܢܣܝܗܝܢ  ܘܡܢ ܗܘܝܘܬܝܗܝܢ.

ܐܠܗܐ ܩܛܥܠܗ ܥܗܕܗ ܥܡ ܐܒܪܗܝܡ ܕܗܘܐ ܥܡܐ ܩܕܡܝܐ ܬܕ ܣܓܼܕ ܠ ـ(ܒܪܘܢܐ ܕܕܘܝܕ ܘܒܪܘܢܐ ܕܐܒܪܗܝܡ، ܡܬܝ 1:1) ܕܝܟ ܕܸܟܙܲܡܪܵܐ ܡܪܝܡ ܒܪܬܐ ܕܐܒܪܗܝܡ ܕܡܟܘܡܠܗ ܥܗܕܗ ܥܡܗ ܘܥܡ ܙܪܥܗ ܠܥܠܡ، ܛܘܒܐ ܛܠܢ ܐܚܢܢ ܟܠܕܝ̈ܐ ܝܠܕ̄ܐ ܕܗܕܐ ܥܗܕܐ، ܕܗܘܝܐ ܐܘܡܬܢ ܩܕܡܝܬܐ ܬܕ ܣܓܕܐ ܬܐ ܒܪܘܢܐ ܕܐܠܗܐ ܘܡܩܪܘܒܐ ܕܫܢ̈ܐ ܛܠܗ، ܐܝܟܢܐ ܟܚܙܘܟ ܓܝܢܢ ܡܢ ܗܕܐ ܥܗܕܐ ܐܕܝܘ ܝܘܡܐ؟؟؟

Follow Us